Simple. Efficient.

CAREER INTERVIEW

မင်္ဂလာပါ .. ခင်ဗျာ

ကျွန်တော့် နာမည် ကျော်စိုးလင်း ပါ။ Swan Arr Electronics & Industries (SAEI) မှာ Chief Operation Officer ရာထူးဖြင့် တာဝန်ထမ်းဆောင်လျက်ရှိပါတယ်။ လုပ်သက် (၁၄) နှစ် ကျော်ခဲ့ပါပြီ ။ ၂၀၀၃ ခုနှစ်က အလုပ်စတင် ဝင်ရောက်ခဲ့ပြီး အလုပ်တစ်ဖက်နဲ့ အဝေးသင်တက္ကသိုလ် တက်ရောက်ခဲ့ ပါတယ် ။ အလုပ်က အဝေးသင်တက်ရောက်တဲ့ ဝန်ထမ်းတွေကို အနီးကပ်ကျောင်းတက် စာမေးပွဲဖြေဖို့ ခွင့်ပေးပါတယ်။ အလုပ်စဝင်ခါစကတော့ အထွေထွေ ဝန်ထမ်း (General Worker) အဖြစ်နဲ့ စတင်ဝင်ရောက်ခဲ့တာပါ။ အလုပ်ကနေ ဝန်ထမ်းတွေကို အသိပညာ ၊ အတတ်ပညာ ရစေဖို့ လိုအပ်တဲ့ သင်တန်းတွေ အခါအားလျော်စွာ ပေးပါ တယ်။ ကျွန်တော် လုပ်သက် (၃) နှစ်လောက်မှာ ထုတ်လုပ်ရေးဌာန မှ Section တစ်ခုရဲ့ Second Head အဖြစ် (၃) နှစ်ကြာတာဝန် ထမ်းဆောင်ခဲ့ပါတယ်။ လုပ်သက် (၆) နှစ်မှာတော့ ထုတ်လုပ်ရေး ဌာနမှာပဲ Department Head အဖြစ် စတင်တာဝန်ယူလုပ်ဆောင်ခဲ့ပြီး စီမံခန့်ခွဲရေး အပိုင်းကို ပိုမို အားစိုက်ခဲ့ပါတယ်။

၂၀၁၂ ခုနှစ်မှာ ထုတ်လုပ်ရေး ဌာန ပြောင်းလဲ ဖွဲ့စည်းပုံ အရ ထုတ်လုပ်ရေး လိုင်း (၄) ခုအနက်က လိုင်း (၄) ရဲ့ မန်နေဂျာ အဖြစ် တာဝန်ယူဆောင်ရွက်ခဲ့ပါတယ်။ Production Management , Supervisory Management , Human Resource Management , စတဲ့ သက်ဆိုင်တဲ့ စီမံခန့်ခွဲမှု သင်တန်းများလည်း အလုပ်က ဆက်လက် တက်ရောက်စေခဲ့ပါတယ်။ ၂၀၁၄ ခုနှစ်မှာတော့ ထုတ်လုပ်ရေးလိုင်း (၄) ခုစလုံးရဲ့ တာဝန်ခံ အရာရှိ (Production Officer) အနေနဲ့ ဆက်လက်တာဝန်ထမ်းဆောင်ခဲ့ပါတယ်။ ဒီတာဝန်ထမ်းဆောင်နေစဉ် အတွင်းမှာလည်း Certified Professional Management (CPM) , Project Management , Entrepreneur , Financial Management , Business Plan စတဲ့ သင်တန်းများကို အလုပ်မှ တက်ရောက်စေပြီး ၂၀၁၆ ခုနှစ်မှာတော့ Organization ကို Corporate Structure အဖြစ်ပြောင်းလဲ ဖွဲ့စည်းပြီးနောက် Chief Operation Officer ရာထူးဖြင့် ယခုအချိန်ထိ တာဝန်ထမ်းဆောင်လျက်ရှိပါတယ်။

ကျွန်တော့် အနေနဲ့ လုပ်သက် (၁၄) နှစ်အထိ တာဝန်ထမ်းဆောင်ဖြစ်ခဲ့ခြင်းက (SAEI) ဟာ စဉ်ဆက်မပြတ် တိုးတက်နေတဲ့ အဖွဲ့စည်းတစ်ခုဖြစ်သလို အဖွဲ့အစည်းနဲ့အတူ ဝန်ထမ်းများပါ လိုက်ပါ ဖွံ့ဖြိုးတိုးတက်စေခြင်း ၊ မှန်ကန်ကောင်းမွန်တဲ့ ဝန်ထမ်းခံစားခွင့်များ ပေးခြင်း ၊ ရိုးသားကြိုးစားသူများ အတွက် တိုးတက်ရန် အခွင့်အလမ်းများရှိခြင်း ၊ အလုပ်နှင့်ဘဝ ညီညွှတ်မျှတခြင်း ၊ လုပ်ငန်းနှင့်သက်ဆိုင်သော စိန်ခေါ်မှုများရှိခြင်း ၊ မိသားစုစိတ်ဓာတ်ဖြင့် ပူးပေါင်းဆောင်ရွက်ကြခြင်း လူသားအရင်းအမြစ်ကို တန်ဖိုးထားခြင်း၊ လေ့ကျင့်သင်ကြားပေးခြင်း စတဲ့အချက်တွေကြောင့် အခု အချိန်ထိ ဆက်လက် ကြိုးစားလုပ်ကိုင်ဖြစ်နေတာပါ။ ယခု အချိန်မှာလည်း ကျွန်တော့် အနေနဲ့ဆက်လက် ဖွံ့ဖြိုးတိုးတက်စေရန်အတွက် လိုအပ်တဲ့လေ့လာမှု ၊ သင်ကြားမှုများကိုလည်း မပြတ် လုပ်ဆောင်နေပြီး (SAEI) လုပ်ငန်းကြီး ပိုမို အောင်မြင်ဖွံ့ဖြိုးတိုးတက်စေရန် အမြဲကြိုးစား တာဝန်ထမ်းဆောင်လျက်ရှိပါတယ်။

မင်္ဂလာပါ .. ရှင်

ကျွန်မနာမည် မခင်လရောင်ဖြစ်ပါတယ်။ Swan Arr Electrinics & Industries (SAEI)မှာ Executive Finance Officer ရာထူးနဲ့ တာဝန်ထမ်းဆောင်လျက်ရှိပါတယ်။ 2008ခုနှစ်မှာ မန္တလေးကွန်ပျူတာတက္ကသိုလ်မှ ကွန်ပျူတာသိပ္ပံဘွဲ့ကို ရရှိခဲ့ပါတယ်။ 2008ခုနှစ် January လမှာပဲ SAEI မှာ အလုပ်စတင်ဝင်ရောက်ခဲ့ပါတယ်။ ပထမဆုံးတာဝန်ထမ်းဆောင်တဲ့ဌာနကတော့ R&Dဌာန ဖြစ်ပါတယ်။ Junior Programmer အနေနဲ့ စတင်လုပ်ကိုင်ခဲ့ပါတယ်။ 2012မှာတော့ Programming အပြင် Website design, Windows Applicationနဲ့ Mobile Application ရေးတဲ့အပိုင်းတွေ ထပ်မံလေ့လာပြီး IT ဌာနမှာ ဆက်လက်တာဝန်ထမ်းဆောင်ခဲ့ပါတယ်။ IT ဌာနမှာတာဝန်ထမ်းဆောင်ရင်းနဲ့ပဲ စာရင်းအင်းနဲ့ပတ်သက်ပြီး Software အသုံးပြုခြင်း နဲ့Manual ကနေ Computerize ပြောင်းလဲအသုံးပြုနိုင်ဖို့အတွက် Format ချခြင်းများပြုလုပ်ရင်း စာရင်းပညာကို ထပ်မံလေ့လာ ဖြစ်ခဲ့ပါတယ်။ 2016 ခုနှစ်မှာတော့ SAEI ရဲ့ ပြောင်းလဲဖွဲ့စည်းပုံအရ CEO ဦးစွမ်းထက်အောင်ရဲ့ တာဝန်ပေးမှုနဲ့ Finance ဌာနမှာ Officer ရာထူးနဲ့ တာဝန်ယူလုပ်ကိုင်ခဲ့ပါတယ်။

SAEI မှာ အလုပ်လုပ်ခဲ့တာ အခုဆိုရင် လုပ်သက်(၁၀)နှစ်အတွင်းမှာ ရောက်ရှိနေပါပြီ။ ဒီအတောအတွင်းမှာ အတွေ့အကြုံကောင်းတွေနဲ့ ပညာတွေလည်း အများကြီးရရှိခဲ့ပါတယ်။ အခုလို(၁၀)နှစ်တာကာလအထိ လုပ်ဖြစ်ခဲ့တာကတော့ Chairman ရဲ့ ဝန်ထမ်းတွေအပေါ်မှာ ထားတဲ့စိတ် စေတနာ၊ အုပ်ချုပ်မှုပုံစံ၊ ပြီးတော့ Chairman၏ သိသမျှ၊ တတ်သမျှတွေကို လူတိုင်းအပေါ်မှာ ပြန်လည်မျှဝေပေးတတ်တဲ့စိတ် စတဲ့အတုယူစရာကောင်းတဲ့ စိတ်ဓာတ်တွေကြောင့်ဖြစ်ပါတယ်။ အဲဒီအချက် တွေကြောင့်ပဲ Organization ကပိုပြီးတိုးတက်ခဲ့သလို ဝန်ထမ်းတစ်ယောက်အနေနဲ့လည်း ပျော်ရွှင်စွာနဲ့ ကြိုးစားလုပ်ကိုင်ဖြစ်ခဲ့တာပါ။

ကျွန်မရဲ့ ခံယူချက်ကတော့ ဘယ်အလုပ်ကိုလုပ်လုပ် စေတနာထားပြီး အကောင်းဆုံး ဖြစ်အောင်လုပ်ရမယ်လို့ ခံယူထားပါတယ်။ လက်ရှိအချိန်မှာလည်း Organization နဲ့အတူ ကျွန်မရဲ့အရည်အချင်းများ တိုးတက်စေမယ့် ပညာရပ်များကို စဉ်ဆက်မပြတ် လေ့လာသင်ယူရင်း ကြိုးစားလျက်ရှိပါတယ်။